Валентин Хорунов – Дьэргэлгэн үбүлүөйдээх түһүлгэтэ
Норуот кутун туппут, Дархан этээччи Валентин Васильевич Хорунов 65 сааһын туолбут үбүлүөйүнэн өрөспүүбүлүкэтээҕи Оһуокай күрэҕэ үрдүк таһымнаахтык ыытылынна.
Күрэх үс бөлөҕүнэн барда. Дархан, идэтийбит уонна улахан түһүлгэҕэ саҥа этэн эрэр этээччилэр диэн арахсан эттилэр. Валентин Васильевич түһүлгэтин Түбэй нэһилиэгиттэн төрүттээх, дьоҥҥо-сэргэҕэ киэҥник аатырбыт этээччилэр: норуокка биллэр ааттарынан сураҕырбыт Куочук Мэхээлэ, Чуораан Дьэлиэнэ, Далаҥхас, Добуй Соппуруон, Сытыы Уйбаан, Н.Н. Осипов, О.П. Романова, М.Д. Данилов, Е.М. Степанова, Анна уонна Дмитрий Дмитриевтар ааттарынан бириистэри оҕолоро туруордулар. Онон: «Түбэй ааттаах этээччилэрин үйэтитэн, өбүгэлэрбитин ахтан-санаан аастыбыт», — диэн Валентин Васильевич эппитэ мээнэҕэ буолбатах. Билиҥҥи көлүөнэ этээччилэртэн Дархан этээччи Светлана Зедгенидзева уонна үтүөлээх этээччи Каджана Евсеева бэйэлэрин ааттарынан анал бириистэри туруордулар. Онон Валентин Васильевич оҕо сааһыгар киэн тутта көрбүт, астыммыт, кинилэр холобурдарын утумнаан, билиҥҥэ диэри норуокка сөбүлэтэр киэҥ түһүлгэлээх этээччи буолар. Ийэтэ Чуораан Дьэлиэнэ хомоҕой хоһоонноох, хамсаныылаах, тарбахха баттанар этээччилэртэн биирдэстэрэ буолар эбит.
Валентин Хорунов – Дьэргэлгэн үбүлүөйдээх түһүлгэтигэр дьоҥҥо-сэргэҕэ сиэнэ Максим Тараяров эмиэ эттэ, оттон күрэххэ кыыһа Елена Тараярова анаан-минээн кэлэн кытынна.
Дархаттар түһүлгэлэригэр бастакы миэстэни Виталий Никифоров, иккиһи Сахаайта Мойтохонова, үсүһү Стас Иванов ыллылар. Идэтийбит этээччилэргэ бастакыны Тааттаттан Афанасий Попов, иккиһи куораттан Петр Григорьев, үсүһү Сунтаартан Марина Хомподоева буоллулар. Эдэрдэргэ бастакыны Сунтаартан Елена Тараярова, иккиһи Намтан Ирина Николаева, үсүһү Мэҥэ Хаҥаластан Айаал Аммосов буоллулар. Маны сэргэ биһирэбил бириискэ бастыҥ этээччилэр ааттаннылар.
Күрэххэ Валентин Васильевич Оһуокай сайдыытыгар сыралаһан үлэлээбит улууһа намнар көхтөөхтүк киирэн кытыннылар. Мэҥэ Хаҥаластан, Бүлүүттэн, Тааттаттан, Үөһээ Бүлүүттэн, Амматтан, Намтан, Горнайтан көхтөөхтүк кэлэн кыттыбыттарын бэлиэтиибит. Үөһээ Бүлүү култуураҕа уонна духуобунаска департаменын салайааччыта, Саха сиригэр киэҥник биллэр Дархан этээччи Сахаайта Мойтохонова үөрэнээччилэрин кытта кэлэн, бар дьонун астыннарда. Кэлбит дьон Сахаайта Мойтохонова алгыстаах түһүлгэтиттэн бары астыннылар. Бар дьон астыннын-дуоһуйдун диэн, Дархан этээччилэрбитин налыччы этиттэрдибит. Онон хоннохторо аһыллан, олус табыллан эттилэр. Күрэххэ бары да оһуокайга ис дууһаларыттан таттарыылаах, алгыстаах тыллаах этээччилэр кэлэн, бар дьон астынна.
Оһуокайга Валентин Васильевич сүгүрүйээччилэриттэн биирдэстэрэ, талааннаах эмчит Иванов Федот Петрович Бүлүү улууһун Дьөккөнүттэн анаан-минээн кэлэн үҥкүүлэстэ уонна Валентин Хорунов этээччилэртэн ураты хамсаныылааҕын биһириирин үллэһиннэ. Күрэх бүтүөр диэри Федот Петрович толору сырытта уонна күрэх үрдүк таһымнаахтык барбытын бэлиэтээтэ.
Сообщение Валентин Хорунов – Дьэргэлгэн үбүлүөйдээх түһүлгэтэ появились сначала на SAKHALIFE.
