Çĕршыв хăвачĕ – халăхсен туслăхĕнче
<p>Тĕрлĕ халăх çи-пуçĕ, апат-çимĕçĕ, юрри-ташши, йăли-йĕрки. Çак тата ытти пуянлăха упракан, туслăх вăйне çирĕплетекен, Чăваш Ен пуласлăхĕшĕн тăрăшакан тĕрлĕ наци çынни «Çĕнĕ Шупашкар – хăлăхсен пĕрлĕхĕн тата культурисен хули» ятпа иртнĕ фестивале пуçтарăнчĕ. Йăлана кĕнĕ уяв кăçал та анлă иртнĕ.</p>
<p>Çĕнĕ Шупашкар – чăваш, вырăс, тутар, çармăс, эрмен тата ытти халăх çыннине кулленех хăйĕн ăшшине парнелет. Юратнă вырăн пулса тăнă хулара наци культурисен пуянлăхĕ, хăйне евĕрлĕхĕ палăрать. Унăн вучахне сӳнме паманнине çулсеренех йĕркелекен фестивальте те çирĕплетеççĕ.</p>
<p>МИНКАДИР РЕЗЯПОВ: «Чăваш Республикинчи пурăнсассăн чăвашла пĕлмелле те пирĕн. Ачасем те пирĕн вĕренеççĕ, хамăр та калаçатпăр тĕрлĕ çынпа, тĕрлĕ уровеньте. Эпир пĕрле пурăнатпăр 10 поколени, пĕрле пурăнмалла пултăр».</p>
<p>Кашни халăх хăйĕн апат-çимĕçĕпе палăрать. Вĕсемпе ыттисене паллаштарас тесе тарават хĕрарăмсем çĕр çывăрман тейĕн.</p>
<p>ЭЛЬВИРА НИКОЛАЕВА: «Нимĕнле уяв та пирĕн иртмест хуплусăр – чăваш халăхĕн тулли апат-çимĕсĕсĕр, шăрттансăр. Ку ĕнтĕ, вырăсла вареники, чăвашла хуран кукли, тăпăрчăпа, сухапа тунăскер. Эпир кашни çул çавăн пек апат-çимĕçсемпе пĕр-пĕринпе вĕренетпĕр. Тутарсем хăйсен апат-çимĕçне хатĕрлеççĕ, эпир вĕсенчен вĕренетпĕр, Марий Эл халăхĕ хăйĕнне хатĕрлет, эпир вĕсенчен вĕренетпĕр, эпир те хамăрăн апат-çимĕçе вĕсене туллин кăтартатпăр».</p>
<p>Фестивале Чăваш Енри Хĕрарăмсен канашĕн ертӳçи Наталья Николаева та хутшăнчĕ. Вăл Çĕнĕ Шупашкар – яланах уявра пурăнакан, çак телейлĕ самантсемпе пурнăçа илемлетекен хула пулнине каларĕ. Фестивале пухăннă кинемейсемпе, хĕрарăмсем вăхăта сая яма юратмаççĕ. Уявра та вĕсем ятарлă çар операцине хутшăнакансем валли алсиш-нуски çыхаççĕ, окоп çуртисем пуçтараççĕ. Культурăпа халăхсен пĕрлĕхĕнче – çĕршыв хăвачĕ. Унăн вăйне фестивале хутшăнакан кашни çын туйма пултарчĕ.<strong> </strong></p>