Шырав отрячĕсен форумĕ вĕçленчĕ
<p>Етĕрне тăрăхĕнче, Сăр юхан шывĕн хĕрринче шкул ачисемпе студентсен шырав отрячĕсен регионсен хушшинчи форумĕ иртрĕ. 5 кун çамрăксем вĕренӳ программисене хутшăнса, тĕрлĕ регион ушкăнĕсен ĕçĕ-хĕлĕпе паллашма пултарчĕç. Форумăн чи пĕлтерĕшлĕ саманчĕсем утă уйăхĕн 2-мĕшĕнче пулса иртрĕç. Шăпах ун чухне стрелоксен 139-мĕш дивизипе фашистсен çапăçăвне кăтартрĕç. Çамрăк шыравçăсен тунсăхласа ларма вăхăт çук. Вĕсем форум парнелекен кашни самантпа, кашни майпа усă курма тăрăшаççĕ. Хастарсен тĕрлĕ лару-тăрăва та, пăтăрмаха та хатĕр пулмалла. Çавăнпа та форум йĕркелӳçисем йывăрлăха лекнисене пĕрремĕш пулăшу кӳрес енĕпе çыхăннă ăсталăх лаççи хатĕрленĕ. Унта хутшăннă хастарсем инкекре хăйсене мĕнле тытмаллине аван пĕлеççĕ. Уçланкăра та хĕрӳ ĕç пырать. Хастарсем палаткăсен çывăхĕнче курав йĕркеленĕ. Шăпах унта вĕсем экспедицисенче тупнă паха экспонатсемпе тата тĕрлĕ йышши хатĕрсемпе паллаштарма пултараççĕ. ДАРЬЯ ГРИГОРЬЕВА: «Мана кунта питĕ килĕшет, питĕ хитре, çанталăкĕ те аван тăрать. Шырав ĕç отрячĕ маншăн иккĕмĕш çемье пек. Эпир кунта астăвам вахтинче пулса, пĕрле пурăнса, пĕрле апат пĕçерсе çисе». Форум аслисемшĕн те усăллă. Ачасемпе çамрăксем çĕнĕ пĕлӳ илнĕ вăхăтра отряд ертӳçисем алла шырав хатĕрĕсем илсе сăр чикки çывăхĕнче ĕçлеме те май тупнă. АЛЕКСАНДР ЖИЛОВ: «Подкова, çĕçĕ, 2 петля. Çынсем ĕçленĕ ĕнтĕ, çав япаласем тухаççĕ. Пуканен ури тухрĕ, кунта 14-16-ри хĕрачасем ĕçленĕ, амăшĕсем те илсе килнĕ. Ача-ачах вăл 14-пулсан та, ун чухне çав пуканесене илсе килнĕ ĕçленĕ чухне, çав 1941-мĕш çулта». Çамрăк патриотсен лагерне регион ертӳçи Олег Николаев та çитсе килчĕ. Вăл шыравçăсен ĕçĕ-хĕлĕпе паллашнă май вĕсене яланах пулăшса тата хавхалантарса пыма тăрăшнине палăртрĕ. Форумăн кульминацийĕ – стрелоксен 139-мĕш дивизийĕпе нимĕçсен çапăçăвне кăтартса пани пулчĕ. Палăртнă хирĕçтăру 1942-мĕш çулхи кăрлач уйăхĕн 5-мĕшĕнчен пуçласа 1943-мĕш çулхи пуш уйăхĕн 21-мĕшĕччен Ржев çывăхĕнче пулса иртнĕ. Историре тарăн йĕр хăварнă пулăма Чăваш Енре кăтартса пама ахальтен суйласа илмен. Тĕл перекенсен дивизийĕ йышĕнче чăваш çыннисем йышлă пулнă. АЛЕКСАНДР АЛАЕВ: «Хатĕрленме йывăр, паллах, анчах эпир пĕрремĕш хут мар çакăн пек фестивальсене тухатпăр. Тапăнса килнĕ пулсан, пирĕн халăх мĕнле тăшмана çак чикĕре мĕнле нимĕçсене хирĕç тăма пултарнине кăтартасшăн эпир çакăнта». Реконструкцие чăнлăхри çапăçу евĕр йĕркелеме тăрăшнă, çавăнпа та ĕçре 1942-мĕш çулхи çар техникине, тĕл пĕрекенсен хĕç-пăшалĕсене усă курнă. ВЕРА ВЛАДИМИРОВА: «Питĕ интереслĕ. Çав салтаксен вырăнĕнче хам мĕнле пулăттăмччĕ-ши тесе шутлатăп, йывăр вĕт-ха пулнă вĕсене. Халь эпир питĕ лайăх вăхăтра пурăнатпăр». Куракансен кăмăл-туйăмĕ, çамрăк шыравçăсен хастарлăхĕ çĕнĕ тĕллевсем патне ăнтăлма, кăсăклă тĕлпулусем ирттерме чĕнеççĕ тейĕн. Шырав отрячĕсен форумĕ – юлашки мар. – Çакăн пек форумсене кашни çул ирттересси çинчен те калаçса татăлтăмăр. Унта ĕнтĕ татах та çĕнĕ шухăш нумай, çывăх вăхăтра эпир вĕсене, паллах, çирĕплетсе хурăпăр, вара кашни çулах, ман шутпа, çак Сăр хĕрринче пирĕн чăваш çамрăкĕсем тата ытти регионтан килекен çамрăксем пурнăçа патриотика енĕпе пуянлатса, тупса ĕçлĕç</p>