Украиналик эркак хотинига бўлган «қайноқ»муҳаббатини қайноқ сув ёрдамида исботлади…
Яқинда Украинанинг Запорожье шаҳрида яшовчи исми-шарифи сир тутилган 34 ёшли эркак кечаси 24 яшар хотини Анастасия Шаповалова билан жанжаллашиб қолганди. Ахир, жанжал ҳамма оилада ҳам бўлади. Кечқурун жанжаллашса, эрталаб эр-хотин ҳеч нарса бўлмагандек яна гаплашиб кетаверади. Аммо бу эркак кек сақлайдиган хилидан экан. Эрта тонгда ўрнидан турди-ю, хотинининг оғзига мажбуран икки қозончадаги қайноқ сувни қуйиб ташлади. Биринчи қозончадаги қайноқ сувни қуйиб бўлгач, аёл жонҳолатда қочишга тутинди. Аммо эркак уни тутиб олди ва иккинчи қозончадаги сувни қуйди.
— Ухлаётгандим, — деди Анастасия. — Эрим тепамга келди-ю, ҳе йўқ, бе йўқ оғзимга қозончада қайноқ сув қуя бошлади. Қўлидан чиқиб қочдим. Аммо етиб олди. Етиб олгач, яна бир қозонча қайноқ сув қуйди. Куймаган ерим қолмади. Бир амаллаб кўчага чиқдим-да, ўткинчилардан «Тез ёрдам» чақириб беришларини сўрадим. Кейин буталар орасига беркиндим. Аҳволим жуда оғир эди. Ҳушимдан кетибман. Кўзимни очганимда ҳаммаёғим дока билан танғиб ташланган. Жоним оғришига чидашнинг иложи йўқ эди…
Афсуски, аёлни жуда оғир аҳволда касалхонанинг жонлантириш бўлимига ётқизишди. Унинг деярли аъзойи бадани жиддий куйиш жароҳатлари олган. Врачларнинг айтишига қараганда, яқин орада Анастасиянинг терисини алмаштириш зарур бўларкан.
Жоҳил эр эса полициячилар тарафидан қидирилмоқда. Унга нисбатан жиноий иш қўзғатилган. Мабодо худо асраб Анастасия тирик қолган тақдирда ҳам эркак камида 5 йил олади.