«Мăнаккасем» премьера
<p>Пĕчченлĕх, тăванлăх, ют пурлăха хапсăнакансене яваплăх тыттарасси тата ытти темăна хускатнă «Мăнаккасем» трагикомедире. Куракансем пĕрремĕш хут сцена çине кăларнă ĕçе çак кунсенче Константин Иванов ячĕллĕ Чăваш патшалăх драма театрĕнче хаклама пултарчĕç.</p>
<p>Раççей паллă драматургĕн, сценарисчĕн Александр Коровкинăн ĕçĕ тăрăх Галина Антонова журналист куçарнă пьесăна куракансем пĕрремĕш çеккунтранах лайăх йышăнчĕç. Çамрăк режиссершăн Алексей Герасимовшăн ку иккĕмĕш спектакль.</p>
<p>АЛЕКСЕЙ ГЕРАСИМОВ: <em>«Ку пьеса детектив майлăрах туйăнать тесе шухăшлатăп эпĕ. Мĕнле пулса тухрĕ – халăх хăйĕн шухăшĕпе пăхма пултарать. Вăрттăнлăх пур. Эпĕ ăна каласа кăтартаймастăп. Ăна килсе курмалла».</em></p>
<p>Аппăшĕпе йăмăкĕ – Гретăпа Роза – авалхи пуян çуртра иккĕшĕ çеç пурăнаççĕ. Пĕри те çемье çавăрман. Ватă çынсене улталаса тупăш тăвас шухăшлă тӳре-шара та, тăван-пĕтен те вĕсем патне çул такăрлатнă. Артистсем пĕр вырăнта тăмаççĕ, пĕрмай кулăшла самантсем. Тĕп сăнарасене РСФСР халăх артистки Нина Яковлева, Раççей Федерацийĕн тава тивĕçлĕ артисчĕ Любовь Федорова калăплаççĕ.</p>
<p>ВЛАДИСЛАВ НИКОЛАЕВ: <em>«Маншăн вăл кашни вылямассерен тата лайăхланса пынă çимĕç пек туйăнмасть çак спектакль. Яковлева, Федорова – эпĕ халех пĕлетĕп вăл вăйлă спектакль пуласса». </em></p>
<p>Фарс комедире вылякан сăнара лайăх калăплас тĕллевпе артистсен хăйсен вăрттăнлăхĕсем те пур.</p>
<p>ЛЮБОВЬ ФЕДОРОВА: <em>«Роле сыхламалла. Ӳкермелле мар ăна. Ӳкерсен те ун çине лармалла. Çăвăнмастпăр пĕр кун малтан премьерăччен. Хамăр çине мĕн пуçтарнă – репетировать туса çавна çуса ярас мар тесе хамăр çинчех усратпăр». </em></p>
<p>«Пушкин карттипе» усă курса çамрăксем те илем тĕнчине туртăнни сисĕнет. Залра пушă вырăн çук. Таисия Захарова вара 40 çул ĕнтĕ пĕр премьерăна та сиктермест.</p>
<p>ТАИСИЯ ЗАХАРОВА: <em>«Эпĕ хам театрсăр пурăнма пултараймастăп. Чăваш драма театрĕ – чи юратнă театр. Эпĕ артистсене питĕ пысăк сывлăх, ăнăçу сунатăп. Татах та вăйлă спектакльсем кăтартса халăхсене ытларах лайăх спектакльсем, режиссерсем лартса пыччĕр. Драматургсем вăйлă спектальсем çырса паччĕр Чăваш драма театрĕ валли».</em><strong> </strong></p>