Шкулсенче юсав ĕçĕсем вĕçленеççĕ
Çĕнĕ вĕренӳ çулĕччен пĕр эрне юлчĕ. Яваплă тапхăра ашшĕ-амăшĕпе ачасем çеç мар, шкулсем те хатĕрленеççĕ. Чăваш Енре 50 процент таран юхăннă шкулсене тĕпрен юсамалли программа ĕçлет. Авăн уйăхĕн 1-мĕшĕ тĕлне 12 шкулта строительство ĕçĕсем вĕçленмелле.
Республикăри вĕрентӳ министрĕ Дмитрий Захаров Шупашкарти 12-мĕш, 24-мĕш шкулсене çитсе пĕлӳ çурчĕсенчи лару-тăрупа паллашрĕ. Кунта шăпах юсав ĕçĕсем пыраççĕ. Министр Сĕнтĕрвăрри районĕнчи Шуршăлти Андриян Николаев ячĕллĕ пĕтĕмĕшле пĕлӳ паракан вăтам шкулти строительство ĕçĕ-хĕлĕпе те кăсăкланчĕ.
Шупашкарти 24-мĕш шкул юсав хыççăн палăрмаллах улшăннă. Хăтлă та илемлĕ вĕренӳ çуртĕнче пĕлӳ пухма, аталанма, спортпа туслашма та меллĕ. Кăçал шкула тĕпрен юсаса çĕнетессипе калăпăшлă ĕçсем пурнăçланă. Мĕн палăртнине туса пĕтернипе пĕрех.
ЛУИЗА ИВАНОВА: «Кăçалхи çул пирĕн çак фасад ĕçĕсене турĕç, кровля улăштарчĕç, урайсене çĕнетрĕç, видеонаблюденисем тата пушар сигнализацийĕсене çĕнĕ требованисемпе лартрĕç. Пирĕн шкула 1964-мĕш çулта лартнă. Эпĕ пĕлнĕ тăрăх, юлашки 30 çул хушшинче тĕпрен юсанă ремонт пулман. Майĕпен ремонтсем туса ирттерсе тăнă, паллах. Вăл пире питĕ савăнтарать. Халăх та савăннă, ачасем те савăнаççĕ, ашшĕ-амăшсем те кăмăллă».
Тĕп хулари 12-мĕш шкулта юсав ĕçĕсем ака уйăхĕн 1-мĕшĕнченех пыраççĕ. Хальхи вăхăтра строительсем вак-тĕвек ĕçсене пурнăçлаççĕ: çурт тулашне сăрлаççĕ, тирпей-илем кĕртессипе ĕçлеççĕ. Пĕлӳ çурчĕ ачасене йышăнма хатĕррипе пĕрех. Сĕнтĕрвăрри районĕнчи Шуршăлти Андриян Николаев ячĕллĕ пĕтĕмĕшле пĕлӳ паракан вăтам шкулта та строительсем хĕрсе кайса ĕçлеççĕ.
ЕЛЕНА ЕГОРОВА: «Çĕнĕ вĕренӳ çулĕнче 230 ача пулать. Кашни çулах ача шучĕ ӳссе пырать. Çавăнпа та пире çакăн пек шкула тĕпрен çĕнетни питĕ вырăнлă тесе шутлатпăр. Пурĕ 62 миллион çурăллăх пăхса тухнă çак ĕçсене тума. Тепĕр 9 миллион курăнман ĕçсене тума укçа параççĕ. Çав вăхăтрах пире лайăх çак программăна лексессĕн, тепĕр 6 миллион çурăллăх çĕнĕ оборудовани килет».
Подрядчик юсава çĕнĕ вĕренӳ çулĕ тĕлне вĕçлеме палăртать. Çавăнпа та тĕрĕслев комиссийĕ ĕçлекенсен шутне ӳстерме йышăннă. Строительсем 2 сменăпа, канмалли кунсемсĕр ĕçлĕç