«Çар-2022» форум
<p>Мускав тăрăхĕнче пĕтĕм тĕнчери «Çар – 2022» ятпа форум ĕçлеме пуçларĕ. Унта Чăваш Республикин Пуçлăхĕ Олег Николаев ертсе пыракан ушкăн та хутшăнать. Яланхиллех Чăваш Енри предприятисем хăйсен çĕнĕ ĕçĕсене кăтартаççĕ. Хальхинче вĕсем 14-ăн.</p>
<p>«Çар» форума пĕрремĕш хут 2015-мĕш çулта йĕркеленĕ. Ун чухне 7 çĕршывран 28 пĕрлешӳ хутшăннă. Çавăнтанпа ăна çулсерен ирттереççĕ. Кăçал пĕтĕм çĕршыври çарпа техника форумĕ çурла уйăхĕн 15-мĕшĕнчен пуçласа 21-мĕшĕччен пырать.</p>
<p>Беларуçри, Китайри, Турцири, Таиландри, Индири, Иранри, Раççейри пĕрлешӳсене Мускав облаçĕнчи Кубинка хули пухрĕ. Форумри куравра пин çурă предприяти 28 000 ытла хатĕр тăратнă. Вĕсен йышĕнче пирĕн регионти Раççей хӳтĕлев министерствипе тачă ĕçлекен пĕрлешӳсем те пур.</p>
<p> Сăмах май, кăçал пĕрремĕш хут Чăваш Ен форума пĕрлештернĕ экспозиципе хутшăнчĕ. Унта чăвашри 7 пĕрлешӳ хăйсем кăларкан таварпа паллаштарать: Шупашкарти электроаппарат завочĕ, «Бреслер», Шупашкарти хăватлă агрегатсен завочĕ, «Каскад», «Технотрон», «Релематика», Улатăрти механика завочĕ. Çаван пекех «Лента», «Автомобиль фургонĕсен комбиначĕ», Чăвашкабель завочĕ, «Элара», «Электроавтомат», «ВНИИР-Прогресс», «Проект-техника корпораци» курава уйрăммăн хатĕрленнĕ.</p>
<p>Чăваш Республикин Пуçлăхĕ Олег Николаев промышленность кластерӗн ĕҫ ушкӑнӗн анлӑ ларӑвне хутшăнчĕ. Унта çар валли ĕçлекен предприятисен ĕçне-хĕлне çĕнĕлле йĕркелес пирки калаçрĕç</p>