Хĕрӳ тапхăр
Чăваш Енре вырма пырать. Республикăри пур хуçалăх та пĕрчĕллĕ культурăсене пуçтарса илме тухнă. Шупашкар районĕнче вырма мĕнле пынине Чăваш Ен Пуçлăхĕ Олег Николаев хăй çитсе курчĕ.
Хир карапĕсем каçалăх хыççăн каçалăх, лаптăк хыççăн лаптăк тасатса пыраççĕ. Çуллахи хĕвеллĕ кунпа çĕр ĕçченĕ туллин усă курать. Тул çутăлсанах тухать те хĕвел ансан кăна ĕçе вĕçлет. Вăхăта сая ярас мар тесе уйрах апатланаççĕ тимĕр утсемпе ĕçлекенсем. Вырмана хăвăртрах вĕçлеме вĕсене хуçалăхра пĕтĕм майсем туса панă. Чăнах та, тухăç иртнĕ çулхипе танлаштарасан ӳснĕ. Пĕр гектартан вăтамран 36 центнера яхăн тĕш тырă илеççĕ. Кăçал пĕр миллион тонна яхăн тухăç пухса илме май пур, палăртрĕ Чăваш Республикин ял хуçалăх министрĕ Сергей Артамонов.
Тухăçа пуçтарнипе пĕрлех кĕрхине те вăхăтра акмалла. Ку ĕçе виçĕ районта пуçланă ĕнтĕ. Республикипе 105 000 гектар акса хăвармалла. Кашни çĕр лаптăкне тухăçлă усă курмалла. Ку енпе ял хуçалăх министерствин район пуçлăхесемпе тачă çыхăнса ĕçлемеллине каларĕ республика ертӳçи. Тыр-пул уй хирĕнчен чăх-чĕп фабрикине.
Çăмарта туса илессипе Муркаш районĕнчи предприяти малтисен ретĕнче. Кăçалхи çичĕ уйăхра кунта 121 миллион çăмарта пуçтарнă. Çулталăк вĕçлениччен 200 миллиона çитересшĕн. Иртнĕ çулта фабрикăра икĕ çĕнĕ цех уçнă. Кашни 100 000 пуç валли. Икĕ цех хута яни çăмарта туса илессине тата 75 миллион чухлĕ ӳстермелле. Икĕ çулта тăватă управăш хута янă. Инвестици проекчĕсене хăвăрт пурнăçлани куç кĕрет. Предприяти тепĕр 300 пуç валли виçĕ çĕнĕ цех çĕклеме палăртать. Тĕллевсене ĕçĕ кĕртсен республикăрах кирлĕ чухлĕ çăмарта туса илме май пулĕ.
– Унсăр пуçне предприятинче çăмарта хуппинчен тăвакан порошок та пур. Çак порошок та тĕрлĕ регионсене сутаççĕ, анчах та çĕмĕрĕлнĕ çăмартасенчен паян хуппине кунта тирпейлеççĕ пулсан шалти сĕткенне хальлĕхе тирпейлемеççĕ. Çак продукцинчен çакна тума пуçларăмăр пулсан кондитер изделийĕсем валли тĕрлĕ ингредиентсем вăл та, ман шутпа, интереслĕ проект пулма пултарĕ.
Муркаш районĕнчен Етĕрне тăрăхне çул тытрĕ республика пуçлăхĕ. Кунта лашапа чупассипе йăлана кĕнĕ ăмарту иртрĕ. Чăваш Ен кубокĕшĕн 24 юланутçă тупăшрĕç. Ăмăрту тăватă тапхăртан тăрать. Унта çĕнтернисем финала тухрĕç. Чăваш Ен ылтăн кубокне «Зов предков РМ» лаша çĕнсе илчĕ. Унăн хуçи Валерий Краснов. Олег Николаев çак ăмăртусем республикăшăн пысăк пĕлтерĕшлĕ пулни çинчен каларĕ, унта ытти регионсенчен те юланутçăсене йыхравламаллине, çапла майпа унăн шайне ӳстермеллине палăртрĕ. Ку республикăна туристсем илĕртме май парĕ