Ачасем - тимлĕхре
Раççей Президенчĕн Хушăвĕпе килĕшӳллĕн 2018-2027-мĕш çулсем Раççейре «Ачалăх вунăçуллăхĕ» ятпа иртеççĕ. Унпа килĕшӳллĕн Чăваш Енре те нумай ĕç-пуç йĕркелеççĕ. Кăçал республикăра йывăр лару-тăрăва лекнĕ 1258 ачаллă çемьене шута илнĕ. Вĕсене пулăшса пыракансен ĕçне кăтартакан, профилактикăпа тимлекен пур пая та пĕрлештерекен электронлă платформа тумалла. Çул çитменнисене яланах сăнаса тăмалла. Ырă ĕç тăвакансен йышне кал-кал ĕçлесе пыракан пĕрлешӳсене кĕртмелле. Чăваш Республикинн Пуçлăхĕ çумĕнчи канашăн черетлĕ ларăвĕнче нумай ыйтăва хускатрĕç.
Ача-пăчаллă çемьесене республикăра пулăшса пыма тăрăшаççĕ. Çул çитмен ачасемшĕн 74 енпе тĕрев укçи параççĕ пулсан, вĕсенчен 17 пулăшупа сусăр ача пуррисем усă кураççĕ.
АЛЕВТИНА ФЕДОРОВА: «Паянхи ларура сывлăх енчен хавшакрах ачасем пирки те калаçрăмăр. Вĕсене канма, сипленме мĕнле условисем туса пани пирки тĕрлĕ ведомство каласа пачĕ. Раççей Федерацийĕнче тата Чăваш Республикинче 10 çуллăх ачасен программи йĕркеленсе ĕçлесе пырать. Чăнах та, пирĕн республикăра тĕрлĕ-тĕрлĕ программăсем пур».
Сывлăх енчен хавшакрах ачасене медицина ĕçченĕсем пăхсах тăраççĕ. Республикăра халĕ 4800 ытларах сусăр ачана шута илнĕ. 2017-мĕш çулпа танлаштарсан, вĕсен хисепĕ 105 таран ӳснĕ. Ытларах Хĕрлĕ Чутай, Çĕрпӳ, Çĕмĕрле, Йĕпреç, Шăмăршă, Улатăр, Куславкка районĕсенче. Чăваш Енри сывлăх сыхлав учрежденийĕсенче ачасене сиплессине малти вырăна кăлараççĕ. Республикăри ача-пăча клиника сыватмăшĕнчи центрта кунсерен 150 хĕрачапа арçын ача сывлăхне çирĕплетет. Чăваш Енри реабилитаци центрĕсене сусăрсем валли меллĕ пултăр тесе юсаççĕ. Çак таранччен 11 объекта хăтлăлатнă. Ун валли 180 миллион тенкĕ уйăрнă. Пĕчĕккисен тавракурăмне пысăклатассипе, культура шайне ӳстерессипе те Чăваш Енре çӳллĕ шайра ĕçлеççĕ. Паян 20 пин ытла шăпăрлан ача-пăча ӳнер шкулĕнче хушма пĕлӳ илет. Ку енпе республика Атăлçи тăрăхĕнче 3-мĕш вырăн йышăнать. Паллах, хушма пĕлӳ илекен çуртсене тĕпрен юсассине те куçран вĕçертмеççĕ.
СВЕТЛАНА КАЛИКОВА: «Кашни çул ачасен ӳнер шкулĕсене юсама пире республика шайĕнчен те, Раççей шайĕнчен те укçа уйăрса параççĕ. Пĕлтĕр нацпроектпа 6 шкул юсарăмăр. Кăçал Шупашкарта ӳнер шкулне юсатпăр. Авăн уйăхĕн 1-мĕшĕнче ачасене кĕтсе илет. Унсăр пуçне виçĕ хулара виртуаллă зал уçнă. Кăçал Çĕнĕ Шупашкарта уçатпăр çав концерт залне».
«Мĕн акатăн – çав шăтать», – теççĕ ваттисем. Чăваш Республикин Пуçлăхĕ Олег Николаев çакна яланах асра тытмалли çинчен каларĕ. «Ачасемпе яланах тимлĕ пулмалла, эпир вĕсене паян мĕн вĕрентетпĕр, ыран вĕсенчен çавна куратпăр», тесе ку енпе тата та ĕçлемеллине палăртрĕ. Алина Сусметова, Бахтияр Велиев