Оперетта фестивалĕ уçăлчĕ
Шупашкарта Пĕтĕм тĕнчери оперетта фестивалĕ уçăлчĕ. Кăçал вăл 3-мĕш хут иртет. Унта Мускаври, Питĕрти тата ытти регионти паллă солистсемпе режиссерсем хутшăнаççĕ. Чăваш Енре пурăнакансен çĕртме уйăхĕн 16-мĕшĕччен юрă-кĕвĕ тыткăнĕнче пулма май пур. Анлă шайри фестиваль «Москва. Черёмушки» оперетта премьерипе пуçланчĕ. Юрă-кĕвĕллĕ камите регион ертÿçи Олег Николаев та çитсе курчĕ. Чăваш патшалăх оперăпа балет театрĕнче иртнĕ вăхăт хуçаланать тейĕн. Культура заведенийĕ умĕнче авалхи машинăсене курма пулать, театр солисчĕсем те хăйне евĕрлĕ тумсемпе. Ку ахальтен мар. Урамра, театрта хуçаланакан сĕм «Москва Черёмушки» юрă-кĕвĕллĕ камитпе тÿреммĕнех çыхăннă. ВАСИЛИЙ НИКОЛАЕВ: «Пирĕншĕн ку режиссура çĕнĕ. Вăл Мускавран килнĕ пирĕн пата. Хăйĕн интереслĕ ĕмĕчĕсемпе пирĕн сцена çинче, сире валли, халăх валли. Фестиваль уявĕ питĕ пысăк уяв теме пулать, мĕншĕн тесен ку уявра эпир пурте ĕçлемешкĕн, юрламашкăн тăрăшатпăр». Дмитрий Шостакович хайланă опереттăна халиччен Пысăк тата Марийинский театрсен сценисем çинче çеç лартнă. Çавăнпа та Чăваш Ен çыннисемшĕн çакнашкал пуян содержаниллĕ камите курма май туса пани – пысăк чыс. Опереттăна Мускав хулинчен килнĕ Дмитрий Отяковский режиссер лартнă. Чăваш патшалăх оперăпа балет театрĕн труппипе темиçе уйăх тăрăшса хатĕрленни сарăма кайман. ВАЛЕНТИНА СМИРНОВА: «Спектакль пирĕн театршăн, пирĕн Чăваш Республикишĕн питĕ çĕнĕ япала, питĕ илемлĕ япала. Çамрăксен юрламалла опереттăра. Паян вара çавсем, çамрăксем юрлаççĕ, питĕ кăмăллă пăхма. Хам вĕрентекен. Вĕренекенсене пăхма та питĕ кăмăллă». Камитри тĕп ĕç-пуç 1950-мĕш çулсенче пулса иртет. Шăпах ун чухне коммуналлă хваттерсенче пурăннă çынсем çĕнĕ çуртсене пурăнма куçнă. Тĕрлĕ пăтăрмах, кулăшла самант сиксе тухни те опереттăра илемлĕн кăтартса панă. ИРИНА ФАДЕЕВА: «Ку вăхăт – пирĕн аннесен вăхăчĕ. Мана ку вăхăт, чăнах та, интереслентерет. Аннесем ку вăхăта каласа парса пире ӳстернĕ, çак вăхăтпа вĕсем пурăннă эпир пĕчĕккĕ чухне». CВЕТЛАНА МЕЛЬНИКОВА: «Тĕлĕнмелле лартнă, тĕлĕнмелле юрăсем, тĕлĕнмелле костюмсем, пурте çав вăхăта аса илтереççĕ, тăхăннисем, утнисем, калаçнисем, чăнах та, тĕлĕнмелле, питĕ килĕшрĕ паянхи спектакль». Оперетта фестивалĕн программи пуян. Юрă-кĕвĕ тĕнчине кăмăллакансем çĕнĕрен те çĕнĕ ятсем уçма пултарĕç. КОНСТАНТИН ЕФРЕМОВ: «Эпир ытти регионсенчен, хуласенчен, театрсенчен кунта чĕнсе илетпĕр, ятарласа халăха çĕнĕ ятсем. Унта халĕ çамрăксем килеççĕ. «Весёлая вдова» та питĕ лайăх, хитре, илемлĕ спектакль-оперетта. 15-мĕшĕнче «Марица» опертта килет Мускавран». Фестиваль çĕртме уйăхĕн 16-мĕшĕнче гала-концертпа вĕçленĕ. Унта Мускав, Питĕр тата ытти хуласенчен килекен сумлă хăнасем те хутшăнĕç. Юлия Адюкова, Сергей Емельянов