Муниципаллă округсене йĕркелесшĕн
Чăваш Республикин Патшалăх Канашĕн черетлĕ сессийĕнче районсене муниципаллă округсен тытăмне куçарас ыйтăва пăхса тухрĕç. Кун йĕркинче 32 ыйту пулчĕ. Вĕсен йышĕнче кăçалхи тата 2024-мĕш çулччен республика бюджетне улшăнусем кĕртесси, туризма аталантарасси, ачасене социаллă пулăшупа тивĕçтересси çинчен. Парламентарисем черетлĕ 7-мĕш сессине Раççейĕн Украинăри ятарлă операцийĕнче вилнĕ салтакĕсемпе офицерĕсене асăнса пуçларĕç. Чăваш Патшалăх Канашĕн Председателĕ Леонид Черкесов кӳршĕ çĕршывра национализм тарăн тымар янине кура Донбасс халăхĕ тĕлĕшпе сакăр çул геноцид политикине тытса пынине палăртрĕ. Донбаспа Луганск Раççейрен пулăшу ыйтнă, паллах, «Пирĕн çĕршыв айккинче тăма пултараймарĕ», - терĕ вăл. Вăл Раççей Президенчĕн Владимир Путинăн ятарлă çар операцийĕ ирттерессипе çыхăннă йышăнăвне ырлани çинчен пĕлтерме чĕнсе каларĕ - парламент унпа килĕшсе пĕр саслă пулса сасăларĕ. Сессири тĕп ыйту - республикăн 2022 çулхи, планпа пăхнă 2023 тата 2024 çулсенчи бюджетне улшăнусем кĕртесси çинчен калакан саккун проекчĕ. Республикăри финанс министрĕ Михаил Ноздряков Чăваш Ен 2021 çула лайăх вĕçленине çирĕплетрĕ. Кăçалхи бюджет 6 миллиарда яхăн тенкĕлĕх пысăкланать. Хушма укçапа усă курмалли статьясен шутĕнче финанс министрĕ кăшăллă вируспа кĕрешемелли мероприятисене асăнчĕ. 175 миллион тенкĕ хушăнать, пĕтĕмпе вара пандемипе сăлтавланнă тăкаксем 556 миллион тенкĕпе танлашĕç. Социаллă тăкаксем те, экономика валли уйăракан укçа та хушăнаççĕ. Калаçу самай хивре пулнине пăхмасăр депутатсем бюджета тӳрлетессишĕн пĕр саслă пулчĕç. Тепĕр пĕлтерĕшлĕ ыйту – район администрацийĕсене муниципаллă округсене пĕрлештересси. Ку пулăма вырăнти хăй тытăмлăх органĕсем ырлаççĕ. ВЛАДИМИР МИХАЙЛОВ: «Пирĕн район депутачĕсен пухăвĕ хăйсен инициативипе тухрĕ çак Тăвай районĕнчен муниципаллă округ туса хурасси пирки. Ку çĕнĕлĕхе пула лайăхланать тесе шутлатпăр ĕнтĕ. Хальхи пек 11 администраци пулмасть пирĕн Тăвайăн 1 муниципаллă округ пулать. Ыйтăва поселени шайĕнче татса параймастăмăрччĕ. Халь ĕнтĕ пĕр администрацире çул-йĕр тăвасси те, шыв пăрăхĕсем тăвасси те. Çутăсемпе тивĕçтересси. Вĕсене эпир хăвăртрах татса паратпăр ĕнтĕ».