Россия Азов ва Қора денгизнинг бир қисмини ёпиб қўйганига Украина норозилик билдирди
0
64
Украина Ташқи ишлар вазирлиги Россия яқин кунларда ҳарбий-денгиз машғулотларини ўтказиш баҳонасида Азов денгизи ва Қора денгизнинг бир қисмини ҳамда Керч кўрфазини ёпиб қўйганига норозилик билдирди.
Украинанинг таъкидлашича, Россиянинг бу ҳаракати оқибатида “мисли кўрилмаган даражадаги катта ҳудуд” кемалар, жумладан, тижорат кемалари қатнови чекланади. Бу эса Украина портлари фаолиятига салбий таъсир кўрсатади. Украина фикрича, бу “Россия томонидан уюштирилаётган гибрид уруш”нинг бир қисмидир.
Аввалроқ Black Sea News нашри Азов ва Қора денгизнинг 13 февралдан 19 февралгача кемалар қатнови учун ёпиладиган ҳудуди харитасини эълон қилган эди. Харитада Азов денгизининг деярли ярми, Керч кўрфази қайд этилган.
Бунинг оқибатида Украинанинг Мариуполь портининг йўли тўсилади, Одесса портига кириш эса қийинлашади.
Қора денгиздаги ҳарбий-денгиз машғулотларига Россия Болтиқ флотининг “Королев”, “Минск” ва “Калининград”, Шимолий флотнинг “Петр Моргунов”, “Георгий Победоносец” ва “Оленегорский горняк” кемаларини жалб қилган.