Ҳокимлик кўзбўямачилигидан шикоят қилган андижонлик аёл ўзини ўлдиришга уринди
0
40
Андижонда ҳокимлик кўзбўямачилигидан шикоят қилган Муяссар Раҳимова оила аъзолари билан жанжаллашиш ортидан шу йилнинг 23 июль оқшомида ўзи мунтазам истеъмол қиладиган дориларни меъёридан ортиқча ичган. Шифохонада аёлга тиббий ёрдам кўрсатилганидан кейин 24 июль куни уйига кетишига рухсат берилган. Бу ҳақда Ўзбекистон Хотин-қизлар қўмитаси матбуот хизмати маълумот тарқатди.
Аввалроқ М. Раҳимова Дарё нашрига берган суҳбатида Россияга бутун умрга кўчиб кетмоқчи бўлганини айтган.
Андижонлик 30 ёшли тикувчи Муяссар Раҳимова президент ташрифи арафаси вилоят ҳокимияти томонидан коттеж берилиши ваъдаси билан ТВ учун интервью олиниб, кейин уйдан чиқариб юборилган 5 нафар аёлнинг биридир.
- Хурсанд бўлиб¸ йиғлаб, президентни дуо қилдим уйлик бўлганим учун. Кўчларингизни эртага обкеласиз, президент келганида тугунларингиз дизайнни бузмасин¸ дейишди. Адрасдан кийим тиктиришди ўзимнинг ҳисобимдан. 300 минг сўмга тушди кийим. Болаларингизни ҳам яхши кийинтиринг¸ дейишди. Президент келганида уй олган бахтли оилага яраша кийининг¸ дейишди. Кейин эса хор қилиб, камситиб чиқариб юборишди. Бу бир ўйин экан. Президентни алдаш учун биздан ўйинчоқ сифатида фойдаланишди¸ деганди М. Раҳимова июнь ойи ўрталарида Озодликка берган интервьюсида.