Украина президенти Зеленский Черкассы шаҳрига қилган сафари давомида маҳаллий прокурорни танқид остига олди…
Украина президенти Владимир Зеленский Черкассы шаҳрига қилган сафари давомида қабулига фуқароларни киритмаётган прокурорни танқид остига олди. Айтишларича, у президент қабулига одамларни рўйхат бўйича киритаётган экан.
Маълумотларга кўра, йиғилиш пайтида Зеленский бир эркак орқада тик турганини кўриб қолган. Сабабини сўраганда, эркак унга жой етмагани, прокурор президент қабулига олдиндан тузиб чиқилган рўйхат бўйича киритаётганини айтган.
Прокурорнинг қилмиши туфайли айрим депутатлар ҳам президент қабулига кира олмагани маълум бўлди. Олдинги қаторда ўтирган депутатлардан бири айтдики, прокурор ҳамманинг жонига тегиб кетибди. Шунинг учун Зеленскийдан прокурорни ишдан бўшатишни сўради. Яна кимдир залдан туриб прокурор порахўрлигини қистириб ўтди.
— Тўғри, прокурорнинг порахўрлиги янгилик эмас, — деди президент. — Ҳар бир вилоятда прокурорлар порахўрлиги ҳақида эшитамиз. Аммо прокурорни ишдан бўшатиш президентнинг вазифасига кирмайди. Бу ишни бош прокурор амалга ошириши лозим. Радани ишга туширайлик, бош прокурорни тайинлайлик, унинг ўзи бу масалани албатта кўриб чиқади. Сизлар шу порахўр билан тўрт йил яшадингиз. Яна пича яшаб туринг. Башарти пора олаётгани ҳақида янги далиллар пайдо бўлса, албатта бизга мурожаат этинглар!..