Сунтаар улууһугар ыһыы бааһыналарын сөргүтүү үлэтэ сайдар кэскилээх
Бэс ыйын 5 күнүгэр, Улуус Аҕа баһылыга Анатолий Григорьев, Сунтаар нэһилиэгин баһылыга Эдуард Филиппов, тыа хаһаайыстыбатын управлениетын салайааччыта Иван Тихонов уонна тутаах исписсэлиистэрэ буолан улууспут киинигэр баар бааһыналарга сырыттылар.
Колхуос саҕаттан быраҕыллан турбут бааһыналары сөргүтэн, чөлүгэр түһэрэн ыһыы ыһар инникитин сайдар кэскиллээҕин анаан үөрэтэн көрөн баран, СХПК «Крестях» бэрэссэдээтэлэ Владимир Егоров көҕүлээһининэн алта бааһынай хаһаайыстыбалаах дьону түмэн, тиэхиньикэннэн көмөлөһөн биирдик бөдөҥсүтэн үлэлииргэ Николаев, Ананьев, Лонкур, Петров, Филиппов уонна СХПК «Крестях» буолан 2015 сылга «Достижение» диэн кээпэрэтип тэриммиттэр. Сельскохозяйственный потребительский снабженческо-сбытовой кооператив исполнительнай дириэктэрэ Ольга Григорьева иһитиннэрбитинэн, былырыын Килээбий, Тураҕас уонна Хатырҕан сирдэрин уопсайа 150галаах сир паардаммыт. Быйыл 220га сиргэ эбиэс, күһүн 85га сиргэ өр сыллааҥҥы от ыһар былааннаахтар. Аан маҥнай бастатан турар бааһыналарга барар 4-5 км усталаах суол омоонун оҥорооһунугар элбэх үлэ эрэйэр эбит.
220галаах сиргэ өр сыллаах оту ыһыыннан дьарыгырбыттар. Дорбой, Кураанах Атах, Бытый, Ипподром буолаларыгар ыһыы түмүктэнэн билигин Килээбий буолатын ыһаҥыныгар киирсибиттэр. Былырыын 150га сир паарданан, быйыл эбии 70га былаанныыллар. Килэбий, Дьэбэрэлээх уонна Хатырҕан сирдэригэр күрүөлээһини былаанныыллар.
Эдэр дьон тыа сиригэр көһөн кэлэн олохсуйан, тыа хаһаайыстыбатынан дьарыктаналлара хайгабыллаах суол. Ол курдук, ИП крестьянскай фермерскай хаһаайыстыбалаах Андрей Филиппов 1га буолаҕа Куокунуттан тиэйэн аҕалан хортуоска олордубут, инникитин кэҥэтэр сыаллаах. СӨ тыатын хаһаайыстыбатын гранын ылан 20х10 иэннээх аныгы матырыйаалынан каркаснай свинокомплекс туттан, аҥаарын оҕуруот аһын уурар сир оҥороору былаанныыр. Улуус дьаһалтатыттан эдэр фермерга дьиэ туттарга гран көрүллэн саҥа дьиэ тутта сылдьар. Билигин 30га сири уопсайа 2,5 км курдук күрүөлүү сылдьаллар. 36галаах сиргэ саҥа 100 төбө киирэр аныгы тииптээх хотон, онтон салгыы инникитин эбии ыанньык тутар былааннаахтар.
Салгыы 2014 сылга ИП крестьянскай фермерскай хаһаайыстыба тэриммит Дмитрий Николаевы көрсөн, Килээбий буолатыгар хортуоска, ону таһынан моркуоп, сүбүөкүлэ олордор сирин көрдүлэр-иһиттилэр. Хаһаайыстыба билигин 70 ыанар ынахтаах.
"Сунтаар улууhа (оройуона)" муниципальнай оройуон дьаһалтатын пресс – сулууспата.